龍蝦鮑魚套餐，明碼實價寫明每位$274，免加一茶芥，經輕度格價後，比較左多間都有郊外油菜同生果/糖水 送，呢間仲多左秘制鹽水雞腳，最正係用「銀聯」unionpay，可減$100，都幾抵。
特濃芝士焗龍蝦伊麵，芝士稀稠適中，唔會好膩，伊麵可以掛滿醬汁，好濃好香好滑。龍蝦味唔太重，勝在厚肉肥美，而且幾大隻幾抵食。
椒鹽瀨尿蝦，我第二次食，原來大隻係好味好多，難得呢度用大隻的瀨尿蝦，所以更多肉更有口感，微彈嫩滑，仲好甜。
薑蔥炒蟹，用兩大隻肥美大蟹，仲要用肉蟹，啖啖肉之餘，仲好鮮甜蟹味濃，而且蟹肉滑溜，蟹鉗肉厚。薑蔥爆得夠香，越食越惹味，又唔會蓋過蟹鮮味。
古法椒鹽鮑魚，每人一隻好睇又好分，賣相的確好吸晴。味道其實一般，鮑魚微彈易咬，口感方面係幾好，但椒鹽蓋過鮑魚味，而且外層偏硬。用清蒸可能更鮮味。
白灼海中蝦超大隻，份量也足夠，肉質鮮甜爽彈，蝦味突出，唔使豉油，直接食更重蝦味，好新鮮。
白灼海螺肉厚肥大，彈牙有嚼勁，一點腥味也沒有，味道好好，加上海鮮醬更滋味。
豉椒炒蜆唔夠熱，鑊氣也不夠，豉椒味雖濃但也過咸，蜆肉同樣太瘦且有點沙，味道麻麻。
秘制鹽水雞腳好腍滑有膠質，入口不用力已食到雞腳肉，筋位都好好咬，沾少少沙薑，味道更惹味。
送郊外油菜只有上湯白菜仔/西生菜，我地揀白菜仔都脆綠吸引，新鮮冇爛葉，有上湯餵過夠味道又唔太咸。
糖水係紅豆沙，微甜多豆帶點陳皮香，雖然唔太起沙，但送既當然收貨。
