無期望就無希望
話說同個朋友去左半月灣曬太陽，出返黎朋友想食海鮮，為左唔想做水魚比人劏，所以叫二人套餐就算。
二人餐每位$298有四款自選海鮮，加碟菜同甜品，感覺還好。
前菜有花生，我都食左好多。
為了驚唔夠飽，跟餐要了份特濃芝士焗龍蝦(伊麵底)。芝士汁都算幾香，而且幾好掛麵。龍蝦肉都幾大舊。
伊麵入口尚算良好，雖然唔係我鍾意的偏硬口感，但未算太淋身。
蒜蓉粉絲蒸扇貝的扇貝唔係痴住個殻，粉絲的量亦唔太多。
香蒜椒鹽墨魚真心麻麻地，佢個粉漿雖然唔算太厚，但基本的熱辣辣脆卜卜都唔多做到，係失望的。
清蒸海上鮮啫係蒸魚，平時唔多食蒸魚的我，都自動夾黎食。骨唔算多，加上魚肉滑溜，整體都幾好。
朋友叫咗一份避風塘炒蟹(兩隻)。螃蟹係餐廳門口旁斷磅秤，加埋二人份的加工錢，呢碟野要二百幾蚊，而且蟹肉唔算多，其實都幾貴下，好彩個蟹炒得都幾香。
二人餐仲包左一碟菜，質素中規中矩。
最後，叫職員幫手安排糖水。今日的糖水是紅豆莎。煲得比預期好，有果皮香，而且都算煲到沙沙地
