有段時間冇食東南亞菜，呢晚就去咗K11新開嘅阿閒泰試下創意泰西fusion菜，除咗食物大份有水準之外，服務都好殷勤！
餐廳食物選擇好多，而且好多都好特別，心大心細咗一輪先決定好！
幸運七式拼盤($168)
拼盤可以一次過試齊餐廳7款招牌小食，包括：秘製三式串燒、泰式單骨雞翼、香煎肉餅、芒果牛油果海蝦米紙卷、脆炸薯條。單骨雞翼蘸上泰式香辣醬汁，帶微辣，非常惹味！香煎肉餅充滿肉香，外面煎得微焦帶脆，可惜細咗少少，唔夠喉呢！芒果牛油果海蝦米紙卷都唔錯，米紙卷煙煙靭靭，包住香甜嘅芒果，軟滑嘅牛油果以及爽口嘅海蝦，口感豐富！當日串燒售罄，改為蝦多士。蝦多士炸得香脆，蝦膠真材實料，彈牙爽口，好食，不過size偏迷你，而且原本三串串燒改為兩件蝦多士，感覺就好似唔夠划算。
阿閒泰手切蝴蝶腩豬肉丸船麵($98)
呢度嘅船麵都幾出名，一向鍾意食船麵嘅我又豈能錯過！湯底肉味香濃清甜又唔會過鹹，味道對辦。麵條亦是泰國空運直送嘅新鮮手造幼粉，難怪食落特別滑同實在，唔會因為浸得耐而變腍！配菜仲有豬肉丸、炸豬皮，豬肉丸口感彈牙，炸豬皮份量都多。蝴蝶腩因為無貨，所以轉咗豬腩肉，肥肉比例較多，可能下次要試下佢嘅手切蝴蝶腩先試到真章啦！
阿閒泰虎蝦卜卜蜆冬蔭功濃湯risotto($158)
非常推薦！呢度嘅冬蔭功雖然唔係好正宗嗰D咁辣，但我自己就好啱口味，湯底食到唔同海鮮嘅精華，特別係蝦味好突出，食落鮮味十足，risotto軟硬度調節過，唔會好似西式咁硬，飯粒完全吸收冬蔭功湯汁嘅鮮甜，加少少青檸仲能夠大大提鮮，味道開胃！
