金寶冰廳: 五一黃金周
今日蘋果嘅頭版，或者你今日打開Facebook或者IG，人人都討論五一黃金周。
當然唔同立場嘅人，今日有唔同嘅支持活動，自己今日沒有安排什麼節目，於是就找間在家附近嘅茶餐廳支持下。
新蒲崗的金寶冰廳，前排在小儀的節目先介紹過，今日都有唔少支持者來撐下場，排隊都排左大約十分鐘。
呢間茶餐廳都有唔少歷史，而且本身都係區內名店。
去年年尾，因為區內連儂牆被人貼上「撐警」的文宣，此店被誤認為藍店，90幾歲嘅老闆更加因為呢件事而表態，於是有不少媒體報道呢一件事，老闆嘅家人更加回巢幫手，發揮一家人的精神，於是呢間金寶冰廳更為人所共知。
我來的原因，除咗因為黃金周，另外一個原因就係呢間係來自70年代嘅茶餐廳，店內的確令人有時光倒流嘅感覺，我最鍾意呢啲餐廳，賣少見少，特別愛地上四十年前的階磚。
店内的選擇，大都係一般茶餐廳有嘅嘢，傳統到不能再傳統。
叫了一個特餐，火腿奄列，熱奶茶，沙嗲牛肉麵，經典港仔午餐。
一如之前聽過，呢度嘅奄烈做得不錯蛋味濃郁。
餐包雖然賣相不太友善，但吃下去還可以接受，唔似係放左好耐乾晒柴晒皮嗰隻餐包。
沙嗲牛肉麵第一口其實感覺普通，但吃落去後，又會漸漸改觀，沙嗲味都唔算係太濃烈，清新得來又有獨特的沙嗲香，配上煮得唔算太腍又唔算太煙韌嘅大光麵上，不錯。
另外叫嘅午餐，主角換上叉燒意粉，賣相也普通但係叉燒卻出奇地好食。
吃過叉燒覺得對辦後，叫了一碟叉燒炒意粉。
叉燒炒意粉即叫即整，都等左大約10分鐘。
上枱的確非常熱騰騰，但係就冇長沙灣我最愛茶餐廳嗰種勁嘅鑊氣。
吃落去意粉比較腍身，又不會太過熱，炒過後嘅叉燒更加好食，加上一點黑椒，可以接受嘅質素，但係你話好好食就一定唔係，無辦法，金園嘅炒意粉，絕對係地上最強，我冇食個邊一間能夠媲美。
不過呢度嘅熱奶茶最正，入口有茶味，奶味又唔會太搶，整體平衡得好好。
整體感覺都不錯，留名下次跟進食菜脯蛋叉燒炒飯，又係名物。
有興趣過來撐下黃金周，就來試下吧。
