BingFood Delivery
食到飄飄然的夢幻韓燒 韓燒係香港時下年青人的玩意，唔認老的我當然會食埋一份！係懶得search的情況下，就去了連鎖式的韓燒餐廳炑八。先講講個環境，餐廳地方寬闊，而且無放題店個D濕滑的地面，而且抽風系統整得幾好，唔會周圍煙霧瀰漫。 夏天係白桃的季節，所以飲品同甜品都以白桃為主題。白桃沙冰($38)的桃味好出，而且食緊熱辣辣的韓燒飲杯凍冰冰的沙冰確係爽呀！如果大家唔想飲咁甜，都可以揀白桃冷泡烏龍，係香而唔澀的烏龍茶加埋陣陣的桃香，都係一個唔錯的選擇。 係食燒肉之前，大家可以先食D麻醬沙律菜及泡菜。 朋友介紹食炑八就一定唔可以錯過芝士豬排炸雞。個豬扒真係不得了，D芝士量夠多之餘，仲有拉絲的效果，簡直完全滿足了視覺及味覺！ 雖然芝士炸雞只係雞粒灑上芝士粉，但有無窮芝士慾望的我，又點會收貨。我將炸雞粒點埋爐邊的芝士粟米(可免費添加)一齊食，甜甜的粟米芝士，加上外脆內軟的炸雞，真係非常惹味。 炑八係有燒烤套餐，一次過食盡每款精選的食材。今次呢份夢幻飄飄燒烤套餐有齊大八爪魚、特級牛骨、春川雞腿、豬五花肉、嚴選牛胸腹、墨魚。大家驚唔夠食就可以以優惠價$98加購一份王者牛肋骨。不過我地叫炸芝士豬排，所以就無叫到牛肋骨。 特級牛骨睇見D脂肪紋分佈就知佢食落一定好香啦！我係燒完後點了少少鹽去吊味，就已經好足夠。 豬五花腩食落岩岩好，唔會太肥，但又夠香。一燒熟就可以用生菜包黎食，味道就剛剛好了！ 復活大八爪魚的份量非常大，好彩有職員協助，幫手處理。八爪魚燒熟後，口感夠淰但有咬口。我自己平時好驚食八爪魚，市面上有好多咬十世的咬唔爛。但炑八呢到做得幾好，雖然我無點任何野，但佢本身的醃料唔會太勁太辣，仲食到八爪魚本身的鮮味。 深海墨魚係我今晚的Best Pick！佢切成薄片，而且用鐵板烤完之後，就有輕輕的焦香。食落同平時食的唔同，佢的口感係有咬口的，而且食到輕輕的咸香。 食到尾當然要食埋甜品先至完滿啦～ 白桃冰沫用了牛奶味的沙冰，入口即溶，而且宦有甜甜的牛奶香。加埋Juicy的原個白桃及白桃切粒，仲有桃的甜漿可以落，令成件事都非常夢幻。
