誤打誤撞嘅Cubus 28
本身同朋友係諗住午餐去位於27樓新開嘅Crabus食海鮮補祝佢生日 朋友早到諗住上去拎位先 點知佢入到𨋢見27同28兩層係同名 以為係同一間 就上左28樓 佢話坐低左發覺唔對路 叫我黎到上27睇睇 我上到又真係唔同 不過唔知係咪新開 見個場又冇人咁濟 又有少少黑 又冇太多時間再諗 於是都係上左28樓坐低食 呢點佢地要改善返 雖然同集團 故事就到呢道
講返間舖 由於本身唔知呢間鋪係主打咩菜式 睇裝潢餐牌就似西式野多 就諗應該都係西餐啦 但又見到啲好特別嘅點心食 呢點就真係好好奇 最後我同友人分別點了主菜set係 美國肉眼扒配香蒜汁（$288）同 香煎澳洲盲鰽配新鮮蕃茄莎莎汁 （$268）然後每個set都會跟一個點心 再加自助沙律吧
而點心就叫左 黑珍珠海膽燒賣 同 竹炭金箔蝦餃
先講自助沙律吧 沙律前菜都非常出色 所有菜生果都好新鮮：
豬頸肉爽勁有咬口 個汁調較得出色 唔係泰式汁 冇太強酸甜味 甜味得宜帶點果香 又好似有少少羅望子醬咁嘅味 非常開胃 每人encore左一兩次
薯仔沙律又係非常鍾意 好驚係果種沙律醬好多 然後薯仔又好碎果種 呢道就唔會 薯仔應該係用新薯 每舊係撈上沙律醬 沙律醬個味唔會蓋過薯仔嘅味 中間有少少煙肉碎有少少咸香 而且薯仔夠粉 好味🤤🤤
到點心啦 每籠都新鮮滾熱辣蒸起 見每枱每籠一開蓋都非常多蒸氣 即叫即整 加分 ：
先黎蝦餃 蝦隻彈牙大隻 一粒蝦餃入面都有兩至三隻完整大蝦 唔係碎哂果種 好過好多連鎖酒樓 呢個真係好好味 至於竹碳味就冇所謂嘅 都係有竹碳味係個皮 唔鍾意竹碳味都冇太大問題
黑珍珠海膽燒賣 上面多左成舊海膽已經好出色 海膽份量都多 海膽唔係非常鮮甜嘅 都有輕輕明礬嘅味 如果成粒pat落口 海膽嘅味都出眾 成粒燒賣嘅肉都好結實彈牙 蝦肉豬肉分明 掂
到主菜 由於本人唔食牛 所以不作評輪 亦都冇影到相 朋友話生熟程度都掌握得唔錯 面頭都有小小煎香嘅紋 牛味好似唔算太重 都好好食
煎盲鰽魚 呢個煎得真系好正 魚皮煎得好香脆 似脆片 帶少少孜然香味係魚皮上 而果個莎莎醬好能夠中和煎魚嘅熱氣 肉質非常嫩滑 魚肉舊舊分明 我都係第一次接觸呢種魚 連朋友都爭住搶食我呢個話：俾啲魚皮我 煎得好食 一定要連魚皮一齊食 有幾重口感
總結 食物質素很好 最衰冇時間再加甜品蛋糕食 好可惜 下次一定黎試試佢 服務態度又好 我地自己趕時間 就吹左佢一下 佢都好好禮貌 仲同我地講返已經預備好 佢又真係預備好 唔夠5分鐘就上埋菜 而且全部都熱 唔似放係度好耐 侍應又主動加水換碟收碟 快手 所以點都會再去 今次誤打誤撞係大成功 最尾都送我地去搭𨋢 親切有禮
