JW咖啡室

JW 咖啡室： 黃鰭吞拿魚之夜 朋友M在WhatsApp中看到我又去JW cafe吃自助餐，然後就有個問題:”有冇咁好食呀，你又去，你有股份咩!” 當然，我沒有酒店的股份，但我的確覺得萬豪的自助餐每次有新主題都值得到訪，上次吃過那個以蟹蟹蟹為主題的已經難以忘記，今次轉了主題後，更加深刻。 今晚的主角係呢條即劏原條捕獲的黃鰭吞拿魚，足足43公斤，自助餐未開始，已經見佢成條霸氣呈現。 本月直至到4月22號晚，呢度每晚都會上演即劏黃鰭吞拿魚的戲碼，可能你會話點解呢排你成日都介紹吞拿魚，無辦法，直劏直食咁新鮮無理由唔介紹，如果你唔鍾意吞拿魚，又或者你今日睇到新聞覺得食呑拿魚刺身唔乾淨，那我也無其他辦法。 首先以萬豪咖啡室的檔次，再加上這個主題，無得輸。 還記得上次有同事睇完我篇文之後想訂，已經非常爆，我希望今次你睇完我篇文後去訂位，可以訂到心儀的日子同有位，祝你好運。 （M先生，特別希望你訂到位吧。） 全條吞拿魚用了10多分鐘便劏完，不同的部位赤身，腩位，背部，拖羅也有，靚位手快有手慢無，全晚都不停會有吞拿魚一路切一路供應，你食到幾多，便有幾多。 的確有得睇有得玩有得食係賞心樂事，怪不得越來越多餐廳潮興即劏吞拿魚作表演。 當然吞拿魚只是一部份的主角，睇番其他陣容，一樣精彩。 海鮮的陣容依舊係全港數一數二，爽口的加拿大龍蝦，滑嫩龍蝦鉗，爆哂膏的加菲蟹，長而多肉的皇帝蟹腳，全隻上的花蟹，還有凍蝦和青口。 刺身有甜蝦、油甘魚、三文魚丶帶子、八爪魚、墨魚、與榮螺，你好少見內容咁多元化的刺身。 壽司方面有吞拿魚、三文魚、平目魚、平政魚、深海池魚、伊佐木、綱池魚、油甘魚、鱲魚及章紅魚，全部都是比較特別或是你在omakase才見到的款式，看完你知道這裏的檔次真的是比其他的自助餐高一小過格調。 你唔好唔記得出邊仲有條好靚嘅黃鰭吞拿魚在等你。 粗俗啲講，食刺身壽司都食懵你。 燒味從來都是萬豪自助餐的必殺技，這裏的叉燒，乳鴿和北京片皮鴨，還有海南雞，都絕對是頂級之作，睇番之前餐廳10篇文，個個都讚你就知呢個檔口一如以往咁正。 當然除了燒味受到讚頌之外，另一個回本咪就係呢度嘅熟食。 未講本身最出名嘅熟食，一定要介紹呢個theme獨有嘅蒜蓉蒸蝦，用上了大大隻的虎蝦，以蒜蓉開邊蒸的手法放入蒸籠蒸，色香味一樣俱全，對我來講反而這個比吞拿魚更加難以抗拒，吞拿魚你最多吃十件八件，但呢度嘅蒜蓉蒸蝦美味到叫你起碼食十隻以上。 仲有一大盤的花膠，鮑魚，海參，龍躉，每一樣菜都有本事叫你預留有一個空位給它，樣樣都咁名貴樣樣都咁好食你，絕對係應接不暇。 麵檔是比較普通的項目，自家包雲吞，粒粒脹卜卜，雖然冇上次咁大隻咁好食，但都不是普通貨色，其他如豆卜魚蛋貢丸蟹籽包魚腐魚片等都不錯，麵的選擇有油麵烏冬米線銀針粉生麵等多種。 熟食還有香煎魚柳，香煎雞胸，燒牛扒和燒羊架，還有次次都不會錯過的海鮮意粉，海鮮意粉的海鮮不是泛泛之輩，而是超美味超名貴的龍蝦鉗，這個我每次都會吃一個a la cart的份。 湯有三種，冬瓜燉豬展湯，燉豬展湯和忌廉蘑菇湯，其實正常人可能都無位飲湯了。 其他的前菜，沙律，不同的火腿如黑森林火腿沙樂美腸意式肉腸，三文魚煙三文魚，你有空才講才吃吧，因為還有強勁的甜品還在後面。 甜品先必推這個芝士撻，每晚出三次，是不可錯過的必食甜品。 其他如Mango and Coconut Mousse Cake和Red Velvet Trifle和Cheesecake和Hong Kong Opera和Poached Re Wine Pear Cream Brulee和Florentine和Brownies和Lemon Meringue Tart和Puff和Hazelnut Financier和Chocolate S'more Cake和Raspberry Cake等等，數之不盡，每樣食一啖你都會飽，你諗下個和字我寫咗幾多次知。 還有豆腐花，龍眼糖水，水果又有多種，菠蘿，火龍果，西瓜，哈密瓜，我想寫到這裏，你都會覺得自己再食落去係會挑戰人體極限。 總之，這裡的自助餐是從來沒有太多投訴的地方，我想要投訴的，就是自己的胃太小，容納不了太多吧。 無謂講太多，快點訂位，來個黃鰭吞拿魚吧。 #2019復活節

帶媽咪去歎茶，慕名到萬豪咖啡室的週末下午茶自助餐。食物選擇很多，質素和味道很捧，尤其是燉花膠湯，足料又好味，再飽也喝了兩碗！其次好吃的是點心，甜品也不錯，只是賣相不夠吸引。最可惜的是用餐時間只有一個小時半，在食物選擇多客人又多的情況下實在是不足夠去每樣食物都試一試，吃也吃得很趕，所以可能不會再來吃下午茶 buffet 了。 #10月活動B

JW Cafe: 如果我們在戀愛 如果我和你談戀愛，大概應有十二三年的時間。 我講緊係愛上JW Marriot自助餐的時間，第一次吃是大學的時候，我打趣和今晚食飯的K小姐說，那個時候，我吃二十四件龍蝦，面不改容，真心愛吃到一個點，我自己回想起都覺得驚。 不過，這幾年少去了的原因，因為有一次吃過後過得有點悶，好像驚喜不在再，然後再沒有意欲去。 直到八月，我需要搞一次與同事慶祝食晚飯，想選擇吃自助餐，同事N先生不斷叫我選擇JW，話幾正幾正，英雄所見略同，只不過當時我說，價錢太貴我不夠錢成間行去食，加上好像有點水準不太stable，我最後沒有選擇。 但我前幾天見到P先生的花膠麵，再燃起了我的興趣，也得知十月佢個新theme好得，星期一晚突然有機會補上朋友的空檔，立刻來食呢個自助餐。 首先想講，只係冇準備相機只有用手機影，好唔靚，見諒。 原來這裡改變了很多，這十年裝修不同了，連名也不同了Marriott 食自助餐的地方，由從前的萬豪咖啡室，變成今天的JW Cafe。 Crab lovers alert係十月主題，剩係看到呢到你己經知道有幾勁，海鮮係我食自助餐以來見過最多。 唔係淨係裝修左改咗名咁簡單，食物都改變左好多，選擇豐富了兩倍左右。 平時都知道海鮮係幾豐富，但今日嘅陣容可以說是前所未有咁鼎盛，從未在自助餐見過的紅花蟹、勁大條的亞拉斯加蟹腳、很少吃到名貴的加菲蟹、可以砌到一座山出嚟的麵包蟹、也很少會任吃的名貴鱈場蟹腳、和我從前最愛的舊情人龍蝦，我可以好肯定話你知你淨係食呢個counter都已經值回票價。 你睇吓啲花蟹麵包蟹龍蝦加菲蟹爆膏到一個點。 不過當然唔係咁簡單。熱葷有好多好名貴嘅食品，我自己做了一個名貴的小拼盤，蟹肉皇帝伊麵為主，送上大片的花膠，海參，冬菇，鮑魚，以大大件的蝦膠釀蟹蓋，還有像臉一般大件的龍躉肉。淨係呢幾個counter又係第二個回本位。 對不起，你以為熱盤得咁少，少年你太天真了。 還有避風塘炒蟹，糯米蒸花蟹，蟹肉雲呑，呢三個都係蟹主題的食物，粒蟹肉雲吞好似拳頭咁大，食到回味足足一星期。 你以爲得牛扒羊架？仲要有大大件的焗躉扒，好味到不行，未食都已經感受到那種震撼。 熟食還有不錯的咖哩，當然還有食左好多年都一樣咁好味嘅白汁意粉，鴨胸，海南雞飯，片皮鴨。 湯又有幾種，我最喜歡合掌瓜燉豬展。 魚生又係勁多，有帶子甜蝦馬刀貝三文魚墨魚和榮螺等等，壽司又係勁多，不過睇你有冇能力食到咁多。 最重要有個天婦羅counter，有蟹腳和軟殻蟹天婦羅，又係勁好食，個個都讚好。 其實我覺得吃完這兩個部份已經不是回本咁簡單，係酒店任食呢堆咁名貴的食物，係超值x10000。 唔好話我賣花讚花香剩係講回本位，講講其他選擇，冷盤都好靚，三文魚都有幾款，凍肉款又係成晚都咁多，仲有好多芝士你選擇。 呢度裝修後，仲有我覺得最靚嘅沙律菜corner，高貴有格調。 甜品都有好多，每版限定的芝士撻對比我之前在SOGO吃的更好吃，當晚有位年青的朋友吃了五件，果然後生可畏。 還有豆腐花，生果，tiramisu，多種不同的cheese cake，我不想多說了，相對不好甜吃的我覺得陣容都非常豐富，但我寧願抽多點時間和肚子吃熟食。 九點九前到十點完自助餐前，我再吃多兩件龍蝦，這就像和舊情人復合一樣的感覺，我肯定這十多年我還是深深愛上這裏的自助餐，愛到不行。 最好係九點幾都仲要有好多海鮮，唔同其他自助餐九點已經所剩無幾。 我覺得這個主題只得一個月實在太少，如果你睇完我呢篇文有興趣，快啲去訂位，愛蟹愛海鮮愛鮑魚愛甜品的來都是沒有錯。 寫到呢度，我好想再食一次，M先生已經叫我訂下星期一，我已經勁想Join佢食多次，不過唔阻佢溝女了。 #10月活動A