今日朋友生日，喺銅鑼灣揀咗一間火鍋餐廳同佢慶祝。去左銅鑼灣京都廣場8樓嘅漁火海鮮刺身火鍋。呢間餐廳食物質素高，非常值得推介俾大家。
上到去見到好多生蠔同埋新鮮嘅龍蝦擺咗喺出邊，搞到人流晒口水。我哋坐低左之後，侍應就即刻俾啲紙我地揀火鍋湯底同埋剔嘢食。仲遞上一盤配料俾我地撈落啲醬汁度。湯底我哋就揀咗皮蛋芫荽豆腐湯，超多皮蛋同芫荽，啱晒我哋啲芫荽迷，好足料。
既然慶祝生日，我哋就決定食豪啲，每人食左一隻西班牙巨蠔，超大隻，味道鮮甜，都只係$68。仲叫左三文魚同帶子刺身添，三文魚色澤鮮嫩，帶子就大大粒。黎呢度記得要食刺身呀！
另外，我地仲叫左好多火鍋配料，呢幾樣大家一定要試！包括有豬粉腸、豬大腸、豬紅、雞子、蟹柳、芝士丸。豬大腸韌中帶軟，豬粉腸就好脆口。豬紅夠滑，浸埋啲湯更加入味。雞子外皮脆脆，內裏裹着嘅物體好似雪糕般融化，超級鮮味。蟹柳口感嫩滑，芝士丸裏面啲芝士更加可以拉絲添～
呢間餐廳食物質素非常高，上菜速度都好快，店員亦都好熱心同有禮貌。如果大家想食高質火鍋，呢個都係唔錯嘅選擇！
