今日一行四人揀左間貴精不貴多的放題，集刺身、火鍋、串炸於一餐的放題，門面好有日本風格的裝飾，主要食靚牛肉的火鍋放題，而且有刺身任食，最特別是有自助串炸，又玩得又食得。
先揀step 1的肉類選擇，有六款價錢由$158-$368，大致上前者較平是美國牛，中價有澳牛，最貴是日本牛。再揀step 2的火鍋湯底，有八個口味選擇，當然還有特色的湯底，但需要再加錢。
我地揀左極上安格斯牛小排放題 $258，點了簡單的九洲濃厚豚鍋，濃而不膩，直接涮蔬菜食已經好好味。
$258以上的餐都可以任食刺身，其他價以下都要加錢。我地點了八款刺身，漏左油甘魚，不過可以任食再點。
三文魚最肥美油潤，入口魚脂又香又滑。甜蝦也嫩滑鮮甜，帶子仲好冰凍，不過都嫩而不腥。北寄貝好大塊，入口爽甜味美。另外象拔蚌同榮螺都非常爽脆甘甜，櫻花魷魚柔軟中帶彈性，仲有飛魚籽的鮮味。
刺身款式頗多，而且味道質量都幾好，值回票價。
等肉類送來時，可以出去調定個人喜好的醬汁，而且仲有沙律吧，有新鮮爽脆蔬菜配芝麻沙律醬超正又開胃。
超豐富的火鍋，有極上安格斯牛小排、特級美國穀飼牛、美國進口牛肉、美國自然豚肉片、羊肉、日本北海道雞肉、蝦滑、墨魚滑，還有附送的花膠、牛白肉、牛柳粒。
極上安格斯牛小排，油脂分佈好完美，一定入口即化滿口油香。
特級美國榖飼牛，手切偏厚身，但肉色鮮豔吸引，脂肪紋平均。
附送的牛白肉及牛柳粒，每人只有一件，份量有點不夠喉。
牛小排好嫩好柔軟，牛脂好香。榖飼牛厚切涮熟都好柔軟，牛味較出，脂肪比例剛好。
牛柳粒有點筋位，好有嚼勁且牛味濃。牛白肉別以為是脂肪，原來是牛胸肉，近牛胸骨的軟骨位，一隻牛只有約一斤，所以都幾罕有，涮至卷曲就食得，非常爽脆好咬，口感一流。
美國進口牛肉及豚肉片味道都不錯，特別是豚肉片味道較好。
切得夠薄身，涮一陣就好快熟，豚肉味香嫩，仲好有彈性，脂肪豐富。沾芝麻沙律醬混麻醬，味道更豐富。
雞肉及羊肉就相對唔算花吸引，雖然北海道雞肉，的確不肥也無渣，但不夠嫩彈，幾健康的雞肉。羊肉有微微羶味，肉質也不錯。
還有灣仔碼頭水餃及蝦滑墨魚滑。
餃子當日無豆苗餃，點了韮菜餃，味道有保證，因為用灣仔碼頭水餃。
蝦滑同墨魚滑都好彈牙爽口，蝦滑特別彈，而且鮮味同蝦味都較重，墨魚滑質感滑而彈口。份量唔會好多，食完可以再點，但追加了一次反而反兩轉，唔緊要，味道太好我地都食哂。
花膠也是附送每人一件，有點厚度，膠質豐富，滑溜又有花膠獨有彈性，吸左豬骨湯味，花膠更美味。
除左肉類需要侍應追加外，還可自助添加蔬菜、丸類等等。蔬菜有4-5款，丸類有6-7款，唔算好多額外選擇，不過肉類刺身都已經好滿足。
南瓜同粟米都好甜，京蔥配牛肉無得頂，另外菇菌吸湯汁好美味。
食到一半想行下消化下，轉換口味，可以自助串炸，帶小朋友玩實好開心，記住要有大人陪同。
串炸材料都較簡單快熟，最回本是蝦，而特別款有煙肉卷腸，健康款有秋葵、蕃薯仔、青椒等。
先揀好材料，先上炸漿，再沾天婦羅炸糠，輕輕放入熱油炸熟，炸熟一般會浮起或半浮，基本上都好快熟。
再起油隔一陣，就可上拎到旁邊加調味。
旁邊有6款味粉，有辣、香、咸......唔同味道，我加了七味粉同海苔，味道幾好。
炸蝦好好味，而且炸衣超脆口，香而不膩，一點也不覺油，正喎。
煙肉卷也咸香惹味，口感有層次。
飲品都是任飲，款式幾多，仲有我至愛維仔檸檬茶。還可以每位加$20有啤酒任飲，加$30有啤酒、清酒及梅酒任飲。
最後每人一杯的haagen-dazs/ dreyer’s ，前者有草莓、曲奇味‘後者有朱古力味。
至於任食雪糕有懷舊的朱古力三文治及蜜瓜雪條，仲有4款口味的雪糕糯米滋，有香芋、朱古力、芒果、雲尼拿。三文治的朱古力雪糕好每人懷念，糯米滋煙韌好咬配雪糕一絕。朱古力同香芋最正，亦都好受觀迎。
