其實我真係好鍾意食椰皇整的甜品，今次同跳舞Buddy係黃大仙跳完舞，就去左附近揾糖水舖食下野，點知食落就幾有驚喜！
呢到有多款滋潤養顏的糖水，除了有燉蘋果雪梨木瓜外，仲有燉桃膠及超人氣的燉椰皇！身為椰迷的我當然唔執書都叫返一份啦～
係多款的椰皇甜品中，我就揀左椰皇湯丸燉蛋白，椰皇的的底有幾多滑嫩的蛋白，加埋大量的西米及黑芝麻湯丸，真係好滿足。最重要最重要的係味道整體唔太甜，只係有椰香加埋天然的甜品，同一般糖水舖食的西米露個D糖甜味係兩回事。
蛋白杏仁茶的甜度同樣係剛剛好不太甜。杏仁的香加上蛋白的滑，入口好順滑，鍾意杏仁的大家不能錯過。
好耐無食芒果班戟啦，今次有朋友叫黎食，我都試左一口。黃黃的班戟皮唔會太厚而且軟熟，加埋厚滑的忌廉及有厚度的甜芒果，整體配合得幾好。
唔知大家會唔會同我一樣，好鍾意食煙韌的糖不甩。呢到的糖不甩一份有8粒，仲要每粒都幾大粒，暖暖地又夠咬口，加埋磨幼的花生粒、芝麻及椰絲，真係好香！
