好耐冇食過太陽蛋豬扒豉油汁飯，突然心血來潮想食，上網搵到呢間光榮冰室，環境光猛企理，座位之間竟然毫不擠逼，坐得舒適。冰室除佐有常餐同碟頭飯外，仲有煲仔飯系列。飲品方面亦有好多懷舊飲品。
點咗三眼仔扒飯($52)，三眼仔指嘅就係三隻太陽蛋，太陽蛋煎得好靚，搖搖欲墜，好吸引。豬扒絕不欺場，非常大塊，完全遮蓋成個飯！豬扒肉質鬆軟，不過䜴油汁就未夠甜香，可以改良。
煲仔飯只於晚市供應，點咗鮮牛肉片煲仔飯($72)加潤腸($15)。鮮牛肉片剛剛熟透， 肉質鮮嫩，完全唔韌。潤腸肥瘦均勻，潤香十足，男友唔食我一個人食曬成條！不過煲仔飯唔算好濃炭香，略為失色，飯焦亦唔多，有改進空間。但店內冷氣充足，食嘅時間唔會大汗淋漓。
加$20點佐一碟油菜，菜心好大碟，喺尖沙咀區黎講真係超級抵食！
飲品方面亦都選擇好多，當中唔少都係懷舊冰室先有，好有特色！簡單點左杯鹹檸蜜，真材實料，檸檬嘅酸同蜜糖嘅甜平衡得恰到好處！