又再次重遊舊地銅鑼灣耀華街既「百樂中心」，
呢座大廈出哂名多野食就唔在講，而今次
聽朋友介紹慕名而黎呢間特色居酒「心之食堂」。
雖然地方睇落唔係太大，不過店內環境絕對睇得
出擺過心思，無論裝飾定係餐具都有一種傳統
日式揉合時尚風格既感覺，當中最觸目既就係
牆上掛左部單車，即刻忍唔住要打返個靚卡呀！👇
-
📌心之魚生飯 - $98
👉打頭陣既就係其中一個餐廳既招牌菜，
賣相相當精緻。顧名思義，擺盤都係以心形為主，
就算連個飯同個碗都非常一致。而裡面既魚生新鮮，
口感又爽口，當中既精髓就係最底既一粒粒既魚鬆粉，
令整個飯粒入口非常彈牙爽甜。最後面頭仲有
一大隻甜蝦點綴非常唔錯！
-
📌蘆筍海老牛肉卷 - $48
👉蘆筍海老牛肉卷係我非常期待燒物，
價錢超抵食，份量比足你。而呢個配搭我
覺得幾有創意，用到蘆筍同鮮蝦再被牛肉包住，
一啖咬落去，層次多變，蘆筍爽脆香甜，
牛肉又夠香濃，口感豐富。
-
📌鹽燒雞翼 - $50 (2串)
👉第二樣必食燒物，我推介呢款雞翼，
表面雞皮燒到卜卜脆，裡面雞肉嫩滑多汁，
非常香口，食得出大廚技術到家，
控制火侯、時間、調味岩岩好，絕對高質推介。
-
📌天然蘋果醋 - $28
👉我揀左杯蘋果醋試下，用黎送燒物簡直一流，
消滯之餘，入口酸酸甜甜，認真唔錯。
