66 Hot Pot, Nelson Street Mong Kok

我比較懶，不用想便點左陸陸海鮮套餐 。包羅萬有，一次過可以食囇雞煲同海鮮。 海鮮火鍋拼盤 + 龍蝦湯 嘩！個龍蝦煲真材實料，有成隻龍蝦在內，而且仲有粟米同蕃茄，難怪湯底鮮甜！龍蝦大大隻，啖啖肉，肉質爽彈，仲有唔少蝦膏在內，正呀！ 雞煲香口惹味，雞肉嫩口又唔辣，送飯一流！ 除左雞煲同海鮮龍蝦窩以外，仲有頂級牛肩胛, 海鮮拼盤，自家炸響鈴, 炸魚皮,手打蝦丸, 墨丸, 魚皮餃, 雲吞, 水餃, 白菜豬肉餃, 韓式泡菜餃,魚片頭, 蟹柳棒, 午餐肉同鮮菜籃，實在太豐富，太滿足！ 頂級牛肩份量唔少，雪花紋十足，賣相吸引，肉味濃又有質感，味道唔錯！ 海鮮拼盤材料十分豐富，有鮑魚、貴妃蚌、大蜆、花甲、帶子、鮮蝦和生蠔，份量十足，而且樣樣都好新鮮！ 鮮蝦爽口彈牙；帶子大大粒，嫩口鮮甜；大蜆有海水的味道，完全無砂；鮑魚有成四隻，十分新鮮，口感爽嫩，實在不錯！ 手打蝦丸蝦味十足，口感彈牙！黑墨丸同白墨丸雖然同是墨丸，但各有特色。白墨丸味香濃，黑墨丸味道鮮爽。炸魚皮十分脆口咸香，真的不能錯過。 水餃、魚皮餃同雲吞水準不俗，絕不欺場，而韓式泡菜餃大大隻，很有特色，有新意。 蔬菜籃也一點也不馬夫。有齊蘿蔔、娃娃菜、冬菇、金菇菜、油麥菜同生菜，鮮綠脆嫩。 今晚大吃一頓，完全滿足了大食積朋友的慾望，既有海鮮，又有雞煲，仲有靚牛肉， 真係多到食唔囇要打包，價錢仲平過上週自己買海鮮回家蒸，實在抵食又好吃。推介！