Walter Bistro

姊妹團又聚在一起high tea chit chit cha，渡過愉快的下午。 觀塘呢間酒店一樓餐廳做梗秋日抹茶下午茶餐，$268/2人，主打抹茶系列。相當抵食。 咸點有芝士火腿牛角包，漢堡包，三文魚三文治，巴馬火腿蜜瓜多士。 甜點有抹茶卷，馬卡龍，芝士蛋糕，抹茶布甸，蘋果金寶，英式鬆餅，抹茶雪糕和即製窩夫。 漢堡包比較有質素，麵包軟熟，漢堡牛味道濃厚。 抹茶卷輕盈，不會太甜，ok 喎。 英式鬆餅好吃，提子乾滿滿，增加口感。 抹茶窩夫即製無限供應，伴以忌亷和紅豆蓉，好味。 餐飲點了cappuccino ，咖啡味不算濃郁，中規中矩。

Walter bistro: 半自助的潮流 疫情蔓延，食肆都經歷了翻天覆地的轉變，特別係自助餐，因為鑽石公主號嘅關係，人人話：不了。 於是市場開始有半自助餐出現，希望令人安心，大家保持距離，減低風險。 當然，昨天政府規定的四人飯聚更加令人唔想出去食飯，令食肆更加雪上加霜。 對一個喜歡講飲講食的人來說，無疑更加慘。 不過除非你係要隔離，大家都有可能會出下街，食下飯，有機會出去就支持下餐廳，優惠通街都係。 就如呢間我從末去過嘅Walter Bistro，原來係觀塘Holiday Inn的出品。 不如就一齊睇下新嘅半自助餐有乜玩法。 第一位$398和第二位$219，之後更加全單八折，呢個價錢，都幾平，因為平日一位酒店吃a la carte都最少二百幾，仲要有咁多野，真係割喉優惠。 有舊同事book 枱時，餐廳員工解說了。 而家嘅海鮮部分通常都係由餐廳攞出黎俾你，呢度就會送上海鮮拼盤，有法國來的蠔，龍蝦、蝦、蟹腳、青口和翡翠螺，全部質素都幾好。 前菜可任食的還有壽司，有多種不同種類俾你揀，三文魚、呑拿魚、鰻魚、北寄貝、油甘魚、蟹柳、海蝦、玉子等等有十六種壽司。 而刺身有四種，呑拿魚、三文魚、帆立貝和油甘魚，係任撈，絕不失禮的質素和份量。 外邊還有不少的湯品，熟食如咖哩、沙律，芝士和凍肉等等，隨你喜愛任吃。 Main Course有好多西餐廳A La Carte嘅選擇，樣樣都做得好精彩，呢個先係主角。 最有感覺的是這個Confit French Duck Leg, White Bian Cassoulet以油封法國鴨脾為主角伴法式焗豆，呢個係平時法式多見的主菜，鴨脾外表脆到不行，肉質肉汁豐富，以酒店格局，二百幾食到呢個主菜，都已經夠平啦。 我最愛另一個係Boston Lobster linguine with asparagus ,lobster bisque，波士頓龍蝦扁意粉配露筍龍蝦汁，好simple 的美感，龍蝦夠彈牙又大隻，意粉條條有鮮甜的龍蝦汁，濃到像龍蝦湯般。 外表麻麻的beef cheeks with mashed potatoes & seasonal vegetable都不錯，燴牛面淋到一個點，放入口好似淋到化開咁，個醬汁味道都好搶鏡，配菜如薯蓉和蔬菜都不錯。 西班牙黑毛豬扒配普羅旺斯雜燴擺盤又係好靚，豬扒質感夠好，而且好有豬味，普羅旺斯雜燴係乜東東？其實係雜菜盤，不過係普羅旺斯特有名字，食野仲有得學野。 另外這個Roasted Beef Tenderloin with seasonal vegetable的烤牛柳又係較硬朗和普通，我較愛燴牛面的細膩。 Pan-fried Seabass with Mashed Potatoes不只有香煎鱸魚，仲有隻帶子係上面，煎得勁香，不過相對剛剛幾個出色的主角，呢個就普通了一點。 尾聲的甜品，我沒有吃太多，朋友都說不錯，特別是水果好新鮮。 幸好我地係規列出台前吃這餐飯，才可以吃足咁多樣美食 換著而家，唔係最多只能吃四款。 當然可能，好多人覺得而家出街食都唔係幾負責任，但有時可能有需要食或順便食埋先番屋企的話，剛巧你係呢區都值得來啦。

有生蠔同長腳蟹的半自助晚餐 為了慶祝我同男人都成功揾到新工，所以就特登去食餐好的！上網見到觀塘有間新的Holiday Inn酒店，所以就貪新鮮去酒店一樓的餐廳試試。 餐廳夜晚提供半自助晚餐，大家坐低後，係餐牌上揀選自己心水主菜就可以了～ 我們就揀左鴨胸及帶子。 落單後，職員就拎左兩盅花旗參燉雞湯及兩份龍蝦比我們。花旗參燉雞湯的花旗參味唔會太淡，加埋雞及瘦肉，味道都幾甜。每位客人都會有半邊龍蝦，龍蝦的肉爽口，加埋D膏，有邊個可以抗拒到？！ 飲完湯、食完半邊龍蝦都未夠喉？你可以好似我咁去刺身櫃，叫師傅幫我們切魚生。今日的精選刺身為三文魚、帶子及魚子。魚子用了軍艦壽司上，佢的油香鮮得黎唔會腥，咬落魚子，D油香就滲曬入D飯內，完全唔會浪費。帶子刺身非常非常厚身，完全同我去日本超市買的原粒帶子刺身一樣咁厚，正呀喂！ 雖然係半自助餐，但餐廳都有提供多款凍海鮮，當中除了蝦、翡翠螺外，仲有長腳蟹、龍蟹鉗及生蠔。生蠔雖然係細細隻，但勝在夠肥美厚肉。職員係客人的面前開蠔，所以絶對唔係廉價半殻蠔。 食前菜食到咁上下，主菜都煮完了⋯⋯ 鴨胸肉用了法國的，油脂比我平時食的少，食落口感較實，而且無腥的味，配埋蘋果蓉甜甜地，味道好Match。 我叫的係香煎帶子配南瓜蓉及茴香沙律。三粒大大的帶子煎得非常香口，加埋南瓜蓉，口感好細滑。大大粒的帶子，外面煎得金黃香口，入面就口感滑溜。 雖然係有主菜的半自助餐，但係自助區都會有D熱食，例如肉醬千層麵、泰式豬頸肉、金華火腿上湯娃娃菜等。 醫好肚就到甜品胃開餐啦～餐廳的甜品比想貨中多選擇，當中有不同味道的布丁、焦糖燉蛋、雪糕及蛋糕。 係眾多的甜品中，最得我歡心的係呢件Tiramisu！佢入口Creamy又夠香滑，最點係佢咖啡酒味都幾香！最衰我已經好飽，如果唔係我會食多件。