中西廚:另眼相看
還記得某年聖誕和弟弟來吃自助餐，有個小意外出現，對自己說，我要忘記不快的回憶，還是以後不來這間餐廳吧。
然後，有天J先生對我說不如來這裡吃餐飯，主題係我最喜歡的台灣加星馬菜。
吃自助餐，最緊要價錢可以接受，而且食品質素絕對不求其，這才是我們這些有年紀的人追求的。 因為，新陳代謝慢 吃不到那麼多，劣食是不可以接受的，以有涯除無涯，結局只有一個。
這間位於西營盤的酒店自助餐都算出名，因為價錢相宜，今次的主題有優惠，星期一到星期四一位晚餐連埋折扣優惠只係三百幾。
未食嘅情況下真係覺得好抵，不過都要試咗質素算定案。
來到先看看必選的部分吧，以這價錢，海鮮無得輸，龍蝦，蝦，翡翠螺，蟹腳等等，以一個絕對唔貴的自助餐價錢，呢間海鮮多而新鮮，絕對是收貨。
沙律凍肉的前菜部分是BAU，沒有什麼驚天動地愛戀過，只有生活淡淡似是流水。
台灣代表點少得蚵仔煎，大大隻的蚵仔，煎得又脆又美味，要叫自己不要吃太多，因為好容易飽。
台北胡椒蝦夠香，當然沒有長安胡椒蝦咁強烈，不過香港質素來說，算不錯。
三杯雞用上九層塔和走地雞，絕對不是求其的水準，特別喜歡其酒香。
紅燒牛肉麵絕對是驚喜中的驚喜，湯頭油香濃，我不會太誇張，有點相近林東芳的氣息。
魯肉飯任你添，你想來肉多又得，汁多又得，飯多有得。
燻肉酸菜割包咁地道嘅夜市野都有，你說驚喜幾大。
台灣腸仔有幾款，你喜歡大腸包小腸又得，點玩都得，幾隻味任你選擇。
鹽酥雞同韭菜餃各有千秋，看你是那個派別。
星馬代表有椰漿飯，你可以自己自由加需要的椰漿，各人好味，飯底煙韌美味，同上次係馬來西亞吃過的無乜分別。
叻沙又點少得，椰香辣味都夠，當然不是好吃得要命那種，但過下口癮已經很開心。
參巴蝦醬蘿蔔糕惹味又夠辣，蘿蔔糕吸盡所有參巴蝦醬的精華，味度強而有力過XO醬好多。
馬來西亞炒粿條用上了地道的方式來炒，加上臘腸，好得。
肉骨茶係馬來西亞品種，藥材味較重，如果係星加坡的胡椒味重，會較喜歡一點。
海南雞飯，雞就麻麻但係嗰油飯勁不得了。
中式的菜也有不少，不過中式來說，燉湯最強，飲兩碗不是問題。
甜品方面，班蘭味嘅雞蛋仔做得十分好，而且負責人係熟手技工，整嘅過程賞心悅目。
仲有即叫即整嘅棉花糖，小朋友實鐘意。
台式甜品嘅也不少，只不過吃了太多台灣新加坡粉麵飯，再也吃不了台式甜品。
當你求其出街食一餐普通飯都要$300落樓嘅時候，其實呢個自助餐絕對係物超所值，尤其是像我一樣愛台灣同馬來西亞的食物時，你會像我一樣，唔敢坐到尾 因為坐到尾一定會食得太飽。
