agnes.the.foodie

二月係生日月，有好多飯聚。今日中午就同朋友嚟銅鑼灣嘅sushi gin食午餐。

朋友上星期已經打電話嚟定位，定位嘅時候已經講咗我係唔食魚嘅。坐低之後，店員亦都有同師傅講返我係唔食魚的，不過成餐午餐之間，都有唔少魚嘅菜式拎咗嚟俾我，每次店員都會過一陣突然醒起我唔食魚，然後又幫我換走返。


今日嘅九件壽司有：白蝦仔、鱈場蟹、天草車海老、赤貝、白象拔蚌、帆立貝、甜蝦、馬糞海膽、松葉蟹。

壽司質素不錯，但不至有驚喜。好幾款食材都以柚子調味，帶淡淡柚子清香。松葉蟹上加咗櫻花蝦，蟹膏又鮮味，個人幾喜歡。

食完蛋之後仲有手卷，因為我唔食魚，所以師傅俾我揀一款我想要嘅食材，我於是揀番覺得幾好食嘅松葉蟹加櫻花蝦。

最後仲有茶碗蒸、味噌湯、同埋抹茶雪糕作結。