烏繩館
這間餐廳位於尖沙咀亞士厘道，他們供應比較少有的冒菜。心中好奇什麼是冒菜，然而見他們差不多全是好評，今天試試看。午餐有四款，分別為單人餐及二人餐，價錢為$48-$128。
這間餐廳裝潢都幾型格。餐廳外牆掛著藤製小燈籠，窗戶又有別緻的格框，而牆上放置多種中式小巧的盛器，滿有中式元素，感覺古樸又不失現代感。
這兒的麵食有五種主食可以選擇，有一般的白飯或米線，也有比較特色的四川火鍋麵、土豆粉和火鍋寛粉。麵餸的選擇唔少，有成五十款！而湯汁也有四種可選，組合彈性幾大。
單人餐B 餐8款$56
今曰選了魚皮餃、龍蝦丸、牛丸、墨魚丸、蘿蔔、冬瓜、雞髀菇、豬潤配清湯土豆粉。每款的麵餸都有兩顆，每一款的味道唔錯，起碼唔係無乜味又粉的劣質丸。龍蝦丸幾彈牙；牛丸爽口又有肉汁；墨丸都有墨丸味；蘿白唔係咁入味，但煮得幾腍；豬潤就麻麻地，由於切得太薄又太熟，口感有點硬。然而這碗麵都幾有個性，清湯味道淡淡的，土豆粉上有滿滿的香蔥和紅棗，配搭有新鮮感。土豆粉粗身，滑溜溜的，唔係咁Q彈，但口感比米缐好。
玫瑰蜂蜜$10
這玫瑰蜂蜜味道清甜，穩穩約約的透出玫瑰香氣，唔錯。
$56的麵食有成八款餸，雖然只是平凡麵食，但倒也十分滿足。可以一試。
#2018聖誕
