早排去左元朗做Facial，所以就約左住係元朗的閨蜜去食Brunch～ 問下地膽有咩餐廳推介，佢就話係Yoho個到有間西餐廳好想試，但一直都見佢Dinner會好Full，所以就試試星期六Lunch Time會唔會有位。
我們一見仲有少量位就衝左入去，職員就帶我們去去張近窗的位置坐低。好鍾意餐廳的樓底好高，加上落地玻璃，真係超級舒服。當時我們見到除了有Brunch外，仲有近排Hit爆的梳乎厘Pancake，所以我們決定只係叫一個Set，再另加一份Pancake開心Share。
每份Brunch Set都會包一份前菜，我們就揀左要脆香雞翼配燒烤醬。D雞翼一份有四隻，而且每隻的Size都唔算細。燒烤汁的味幾濃味，而且整得幾入味。但唯一係雞肉有少少乾，不過整體還算不錯的。
唔知點解個Pancake話要等20分鐘，但佢仲快過個意粉黎⋯⋯ 一份有兩塊的Pancake幾厚身，加埋Honey Butter、雲呢拿雪糕、忌廉及鮮果，睇見已經好吸引。正當我想放少少雪糕上暖暖的Pancake時，發現個雪糕球硬到一個點 (呆)⋯⋯ 所以我只好用鮮果忌廉去配Pancake。
Pancake的質地有空氣感，而且唔會唔熟。雖然蛋味唔夠香，不過係唔洗排成粒鐘先有得食的話，我收貨。
食完無耐，我們的卡邦尼意大利麵就到了！意粉整體的忌廉都幾夠，而且配菜都幾多。
個汁都幾掛汁，蛋黃忌廉汁的味都幾Rich，加埋甜甜地又切得厚身的蜜汁火腿及蘑菇，口感十足！
每個餐都會包一杯飲品，朋友就加左$10要杯凍朱古力。我就淨叫一柸熱咖啡。
最後，個Brunch仲會包一球雪糕⋯ 同Pancake的雪糕一樣，硬到不得了⋯ 不過係Weekend慢慢食住雪糕，傾下八掛野，都係人生一大樂事。
#2019復活節
