「那是快感還是痛，深海裡永遠看不通。」
自細就好鍾意睇佛偈，慢慢發現究竟人生會有
幾多得著，聽得多睇得多又會參透到幾多？
道理有萬幾種咁多，可能果刻心靈清靜時，
就好容易聽得入耳。但隔第二日訓醒又係
另一回事，其實每日都係不斷循環。時時都會
諗起呢句「本來無一物，何處惹塵埃。」，
最想係呢個本有今無，本無今有既境界下，
好好嘆返一道味覺與視覺雙重感受既Omakase，
所以今晚同朋友二訪「鮨真 - Sushi Ma
Japanese Restaurant」，將呢份體會靜靜地
浮遊在青空，一轉身可以化進了杯中。👇
-
📌鮨真 · おまかせ · (真) - $3980/2 Person
♦先付け -
▪ 粒貝BB · 酸髮菜 · 溫室蕃茄啫喱 -
▫ 前菜當然要開下胃先啦，呢個用醬油煮過
粒貝BB，形狀嬌小，質感帶光澤，食落鮮甜
爽口，加左醬油有提鮮既效果；酸髮菜上面
放左日本長芋，撈勻一齊食清清甜甜，幾醒胃；
而另一舍用左溫室蕃茄整既啫喱，本身入口
已經好鮮甜，咬落仲會係口腔內爆汁，
認真過癮！
-
♦刺し身 · 8点 –
▪ 金目鯛 -
▪ 右口魚 · 薄切 -
▫ 好！開始向住刺身進發，先黎個金目鯛裡面
卷住紫菜同埋梅醬，點少少Wasabi一齊食，
味道岩岩好到位。而且魚油入口甘香，
口感爽身，唔錯；右口魚薄切裡面卷住
酸汁啫喱，唔需要點醬油。食落比左口魚
更加濃厚肥美，配上酸汁可以中和返油膩感，
呢個好食！
-
▪ 小松丼 · 九洲生蠔 -
▪ 日本咸館 · 赤座蝦刺身 -
▪ 青森縣 · 原隻新鮮紫針海膽 -
▫ 再黎三款刺身，我可以話係我成晚最愛呀。
我地先食個生蠔先，上面鋪放左少少紅色蘿蔔蓉
同埋酸汁，就咁食唔需要額外加醬汁。就咁睇
賣相都知非常迎鮮，肉身豐厚飽滿，食落爽甜多汁，
滲出少少海水味，相當好食；跟住就係紫針海膽，
由北海道直送落黎，色澤同味道顯然同平時見既
海膽有過之而無不及！入口順滑香濃，滿足感
瞬間爆發；而最後係一般出面Omakase
甚少食到赤座蝦，肉質口感爽彈，色澤光亮
嫩滑，加埋個精緻蝦殻真係盡收眼底，
簡直係我大愛呀。
-
▪ 大拖羅 -
▪ Sake · 蒸鮑魚 -
▪ 火炙 · 赤睦魚刺身 -
▫ 最後三件刺身，先食左個清酒蒸鮑魚先，
師傅用左足足四個鐘去蒸，唔怪得口感咁爽彈
鮮甜啦，Staff建議唔需要點醬汁就咁食味道係
最正既，我都認同；跟住就係赤睦魚，師傅
點左醬油再經火炙，入口味道香濃，肉質爽脆
鮮甜，點少少Wasabi一齊食，將味蕾大大提升；
最後大拖羅一定係最遲食是識吧，雖然質感厚身，
但入口即溶，軟滑無比，完全可以話係
肥潤滑溜，無得輸呀！
-
♦キンキ · 塩焼き -
▪ 鹽燒北海道喜知次 -
▫ 今個Set另一亮點就係呢條有「深海紅寶石」
之稱既北海道名產喜知次，一年四季都食到既
水產，但價值相當珍貴。主要有分養殖或手釣，
而呢條就係屬於手釣種類，所以肉質比較白淨。
經鹽燒後，魚皮食落口感脆卜卜，肉質滑嫩，
油脂入口豐富，帶少少海鹽味，骨裡面既
膠質綿密，就咁食已經相當滿足，
果然係日本名貴海產之一。
-
♦寿司 · 6貫 -
▪ 太刀魚 -
▪ 吞拿魚 · 腦天 -
▪ 吞拿魚 · 面珠墩 -
▫ 食完條咁高質既喜知次後，又到壽司既
環節啦。呢三樣都係我好少食到既種類，
先講太刀魚肉質嫩滑，食落完全無腥味，
感覺清新爽甜；吞拿魚腦天姐係頭頂蓋位置，
輕輕火炙燒過油香出眾，配搭紫菜、芝麻蔥
一齊食，份外香濃爽脆；而吞拿魚面珠墩
面頭放左蘿蔔容、牙蔥，口感爽彈，
帶少少筋位，特別有咬口，好有特色。
-
▪ 粒貝 -
▪ 春子鯛 -
▪ 富山灣 · 白蝦 -
▫ 最後三款壽司分別試埋粒貝，食落新鮮
肉質軟腍彈滑，面頭加左炭鹽，入口份濃郁甜美；
春子鯛魚身特別，反而質感係最軟滑既，
味道比較清香爽口；而白蝦光澤亮麗，
連埋昆布一齊食，口感爽彈，
係我食過最高質既白蝦！
-
♦吸 · 物 -
▪ 大蜆清湯 -
▫ 以原隻大蜆隨上既清湯，一打開個蓋已經
聞到香味，認真唔話得。清湯飲落非常
新鮮鮮甜，大蜆肉質肥美，隱約中食到
淡淡既海水味，相當滿足。
-
♦水菓子 -
▪ 夕張橙肉蜜瓜 -
▫ 當然有頭有尾，最後食埋佢地既生果
做個完美既終結啦，蜜瓜來自北海道夕張市，
果肉的確同個名一樣，帶鮮橙色，夠哂新鮮。
而食落爽甜多汁，完全有消滯既功效，
真係好想對住師傅大嗌encore呀！
-
📍 鮨真 - Sushi Ma Japanese Restaurant
🎈尖沙咀亞士厘道17-19號20樓
